डोंबिवली : गेल्या आठवड्यात घरगुती सिलेंडरची किंमत 50 रुपयांनी वाढल्याने गृहिणींचे आर्थिक गणित कोलमडले आहे. यातच आजपासून घरगुती पीएनजी आणि वाहनांच्या सीएनजी गॅसची दरवाढ झाल्याने नागरिक या भाववाढीने हैराण झाले आहेत. या दर वाढी विरोधात दिव्यात शिवसेना ठाकरे गटाने अनोखे आंदोलन करत सरकारचा निषेध व्यक्त केला. स्टेशन परिसरात रस्त्यावर चूल मांडत भाकरी थापून यावेळी आंदोलन कर्त्यांनी सरकार विरोधात घोषणा बाजी केली.

भाजप सरकार विरोधात मंगळवारी दिव्यात नागरिकांच्या संतापाचा उद्रेक झाला. दिव्यात शिवसेना उद्धव बाळासाहेब ठाकरे पक्षाने आंदोलनाचा दणका दिला. मुंबईसह उपनगरात आज पासून सीएनजी दीड रुपयाने, तर पीएनजी म्हणजे घरगुती पाईप गॅस एक रुपयाने महागला आहे. त्यामुळे आता सीएनजी 79.50 रुपये प्रति किलो तर पाईप गॅस प्रति युनिट 49 रुपये झाला आहे. घरगुती गॅस साठीचा खर्च वाढला असून डॉलरच्या तुलनेत रुपयाचा भाव वधारल्यामुळे गॅसच्या किमती वाढवावे लागल्याचे एमजीएलच्या अधिकाऱ्यांनी सांगितले.

हेच का मोदीचे अच्छे दिन असा सवाल विचारत दिव्यात उद्धव बाळासाहेब ठाकरे पक्षाचे दिवा शहर संघटक रोहिदास मुंडे यांच्या नेतृत्वाखाली आंदोलन करण्यात आले. महिलांनी चुलीवर भाकरी बनवून भाजप सरकारचा निषेध केला. सिलेंडरच्या सबसिडीच्या नावाखाली हे सरकार लोकांची फसवणूक करत आहेत. देशात उज्वला योजना राबवून मोदींनी मन की बात मध्ये म्हटले होते की महिलांचे धुराचे अश्रू मला पहावत नाहीत. म्हणून उज्वला योजना राबवण्यात आली. परंतु आज याच सिलेंडरचे भाव गगनाला भिडलेले असून सामान्य महिलांचे हाल होत आहेत. व पुन्हा चुलीवरती जेवण बनवण्याची परिस्थिती देशात मोदी सरकार करत आहे.

शिवसेना उद्धव बाळासाहेब ठाकरे दिवा शहराच्या वतीने गॅस दरवाढी विरुद्ध निषेध आंदोलन करण्यात आले. या आंदोलनाचा नेतृत्व दिवा शहर संघटक रोहिदास मुंडे, दिवा महिला शहर संघटिका ज्योती पाटील, विभाग संघटिका मयुरी पोरजी यांनी केले. यावेळी उपशहर प्रमुख तेजस पोरजी, उपशहर संघटक प्रवीण उतेकर, विभाग प्रमुख नागेश पवार, संजय जाधव यांसह अनेक पदाधिकारी कार्यकर्ते उपस्थित होते.